ما نشرته ملاك الوحداتية على صفحتها الشخصية
انا ملاك الوحداتية
الحمد لله رب العالمين حمدا كثيرا طيبا مباركا فيه ملء السموات والأرض
والحمد لله حتى يبلغ الحمد منتهاه الحمد لله الحمد لله الحمد لله
وأخيرا بفضل الله انتصرت على مرض السرطان
لما عرفت إنو معي سرطان كانت ردة فعلي طبيعية مش بس لإني صغيرة وما بعرف كتير بمدى تأثير المرض على جسمي ، بس لإني كنت بعرف إنو متلو متل أي مرض ، متل الرشح او الحرارة بيجي فترة وبروح بعدها ، وبضل أنا بشقاوتي وحلاوتي وحُبي للعلب والضحك والفرح
حكولي إنه ربنا بحبك عشان هيك إبتلاكي بهاد المرض ، وانا لإني كمان بحب ربنا كتير قررت أصبر عليه وأكون اقوى منه ..
والحمدلله انا اليوم صرت وحدة من الناس يلي انتصروا على السرطان بالتحدي والإيمان ويقيني الكبير ب ربنا
مرت علي لحظات كنت اتوجع فيها كتير ، لحظات كانت صعبة علي ، لحظات كنت أكره فيها هاد المرض وأدعي بس ربنا يخلصني منه بأسرع وقت عشان أرجع لمدرستي وحياتي الطبيعية مع عيلتي وصاحباتي ..
ايام كنت اتمنى ألعب فيها مع البنات يلي قدي واركض متلهم بس كانوا يمنعوني أحياناً لأنهم كانوا يخافوا علي أتعب أكتر بس هلأ رح ارجع العب وانط بدون ما حد يقلي ممنوع يا ملاك
كتير كنت اشتهي أكل الاكل يلي بحبه بس برضو كان ممنوع مشان ما يزيد المرض لا سمح الله ، بس هلأ رح ارجع اكل شبس واندومي قد ما بدي
صحيح برضه إني فقدت شعري لفترة مُعينة بس هيو رجع أحلى من أول
الحمدلله رب العالمين إنو شافاني وعافاني من هاد المرض بسبب دعوات ماما إلي والناس يلي بحبوني
ضلكم مبسوطين ولا تستسلموا للمرض والوجع لإنه رح يجي يوم تنتهي فيه كل ألامنا ونعيش بس بسعادة