إخواني الكرام في المنتدى ,,, الله يعطيكم ألف عافية ,,, و يجعل كل أيامكم حلوة و سعيدة و إن شالله القادم أفضل لنا و لنادينا العظيم ,,,
رح أحكي عن تجربة شخصية و أتوقع إنو بالإمكان تعميمها على الجماهير الوحداتية في كل أصقاع الأرض ,,,
إحباط
بعد تعادل الوحدات أمام الرمثا يوم الجمعة وضياع فرصة حسم الدوري و إراحة الأعصاب و القلوب ,,, دخلت بنوبة من الإحباط ,,, و تفكير لا نهاية له ,,, يعني زي ما تقولو دخلت بالحيط ,,, كيف ,,, ليش ,,, مين ,,, مش عارف شو ,,,
و هالحكي كان لسان حال السواد الأعظم من الجمهور الأخضر ,,, و برأيي المتواضع ,,, هو نتيجة طبيعية لواحد رايح يحتفل بـ لقب و روح و هو مو مخلص الموضوع ,,,
هدوء
يوم السبت دخلت بمرحلة الهدوء ,,, تفكير عميق ,,, تحليل الوضع ,,, تحديد نقاط الضعف - طبعاً ما طلعت ولا بنقطة يمكن - ضليت ع هالحالة يوم كامل ,,, و أنا أنبش عن الخلل وين ,,, النتيجة اللي طلعت فيها بالمجمل ,,, إنو الخلل بالمنظومة كاملة ,,, يعني الخلل مو بالمدرب بس ,,, ولا باللعيبة بس ,,, الخلل بمنظومة الوحدات منذ البداية ,,, من أيام خانكان لليوم ,,, كان في إشي غلط ,,, بس مرحلة العلاج مو هسة ,,, يا إما كانت زمان ,,, أو في المستقبل ,,,
ضليت أفكر شو القصة لحد ما وصلت لمرحلة إنو لازم ألاقي تصرف سريع و فعال - حل جذري - للمشكلة ,,, أبطل أشجع الوحدات يعني ,,,!؟ ,,, طب ما هو الواحد مات و هو بشجع ,,, وقفت ع هالمباراة يعني ,,,!؟ ,,, أمري لـ الله ,,, رايح يوم الجزيرة و اللي بدو يصير يصير ,,,
ترقب
يعني علي الحلال ع قد ما قرأت تحليلات و مقالات و مواضيع هاليومين ,,, حاسس حالي رؤوف خليف ,,, كلو بحكي و بحلل و بفكر و بقول هيك ,,, و الثاني برد عليه لأ هيك ,,, بس أهم نقطة شدتني ,,, و " أثارت حفيظتي " ع الآخر ,,,
الوحدات ما بستحق الدوري ,,, و إذا بناخذ هاللقب بكون البقعة فاز ع الفيصلي ,,, يعني كلام ماشي حالو ,,, بس أتوقع إنو كنا أحسن السيئين هالموسم ,,, و البقعة إذا بدو يفوز ع الفيصلي مو لـ سواد عيوننا ,,, لإنو وضعو ما بتحمل نزيف نقاط ,,, و لازم نخدم حالنا بـ حالنا ,,, بدنا الدوري ,,,!؟ ,,, بدنا نفوز ع الجزيرة ,,, أنا هيك بفهم ,,,
فـ صرت أستنى يوم المباراة بدون وعي أو تفكير ,,, قاعد بحسب كم يوم و كم ساعة ضايل للمباراة ,,, و بدي أطلع بالساعة الفلانية ,,, و بدي أقعد مش عارف وين ,,, و أقسم بالله إني نسيت إنو عنا مباراة بكرة بـ كأس الإتحاد الآسيوي ع قد ما الموضوع شاغل بالي ,,,
خلاصة
بتذكر في موسم من هالمواسم ,,, كان في فريق مش عارف مين هو متأخر بمباراة الذهاب و بدو 2-0 بالإياب ,,, مدرب هالفريق أعطاها تصريح - من الآخر و كثير قوي - إنو فريقي مش لازم يسجل الهدف الثاني قبل الأول ,,, بمعنى إنو الحل لازم يكون ع مراحل ,,, و ما نستعجل لدرجة إنو نضيع الأول و التالي ,,,
بمعنى ,,, الدوري خلينا نحطو ع جنب لبكرة ,,, و نركز بمباراة الحد البحريني ,,, بس يصفر الحكم بكرة ,,, بنحط براسنا قصة الدوري ,,,
هسة الفريق سيء ,,,!؟ ,,, جداً ,,, بلعب مليح ,,,!؟ ,,, بالمرة ,,, طب و الحل ,,,!؟ ,,, شجع و إدعم و خليك معاهم ,,, و سيبك من " المهاترات " اللي قاعدة بتصير هون و هون ,,, رئيس الجزيرة صرح ,,, محمود صايل توقف ,,, البث رح يكون لمليون مباراة بوقت واحد ,,, هالإشي ما بهمنا ,,, يوم المباراة ,,, بتسحب حالك إنت و صحابك و إخوانك ,,, بتشرفنا ع الملعب ,,, بتشجع بأخلاقك العالية اللي هي الأصل عند كل الجمهور الأخضر ,,,
اللي بتشوفو مش متشجع يطلع ,,, شجعو يطلع ,,, روح و شجع هالساعتين ,,, بتروح بإذن واحد أحد مبسوط و فرحان ,,, توضى و صلي قبل ما تطلع و حط أملك بوجه الكريم ,,, و إن شالله ما بتروح خايب ,,,
أحدهم يقول الآن : ع أساس فريقنا ببيض الوجه و بلعبو طابة ,,,!؟ ,,,
خليني أذكر بأكمن نقطة " بديهية " بتخليك تطلع و إنت متفائل ,,,
1) فريقنا متصدر رغم كل الغباء اللي قاعد بصير ,,, و مصيرنا بإيدينا ,,, الفيصلي بستنى نتعثر عشان يفكر بالدوري ,,, إحنا ما بنستنى حدا ,,,
2) يوم المباراة رح نكون نحضر مباراة فريقنا ,,, بس غيرنا رح يكون بتطلع ع لعيبتو و فكرو كاملاً عنا و بمباراتنا عشان يشوف شو بصير معنا ,,,
3) إن شاء الله الفوز بكرة ع الحد رح يعطي فريقنا دفعة معنوية كثير قوية ,,,
4) بـ أسوء الأحول ,,,!؟ ,,, الجزيرة بدو يسكر دفاعو و نتعادل مثلاً ,,,!؟ ,,, في مباراة فاصلة وقتها ,,,
5) إنت لما تروح ع الملعب بترفع راسك لـ السما ,,, لإنك مشجع وحداتي ,,, وصلت المباراة الأخيرة بالدوري بدون ما يكون برصيدك أي نقطة " مشبوهة " ,,,
6) روحنا الجمعة زعلانين ,,, و إحنا بالباص مروحين ,,, والله إحنا و ناس من الجمهور ما بنعرفهم بنتعاهد نتلاقى يوم المباراة الختامية ,,,
بتعرفو ليش كل هالحكي ,,,!؟ ,,, لإنو الوحدات علمنا كيف نكون أقوى ,,, علمنا كيف نرجع نوقف بعد الوجع ,,, علمنا كيف نضحي بوقتنا و صحتنا عشان الوحدات ,,, الوحدات يا إخواني علمنا شو يعني تيجي ع الملعب الساعة 10 و المباراة ع 4 و نص ,,,
الوحدات علمنا نكون معو وقت الشدة ,,, علمنا إنو كبرياء الوحدات و كبرياء الجمهور ,,, راس المال اللي بتوخذ في بطولات ,,, علمنا شو يعني من يوم الجماعة لهسة تضل تفكر بالمباراة ,,,
أتحداكم جميعاً ,,, بدون إستثناء ,,, مين منكم ما حضر ثلثين فيديوهات الوحدات اللي ع اليوتيوب ,,,!؟ ,,, أو ما شاف أهداف و مباريات حساسة و هامة في تاريخ النادي ,,,!؟ ,,,
إرفع راسك ,,, إنوي النية الحسنة ,,, قول يا رب نفوز بكرة ,,, و بعدها بإذن الله التوفيق في ختام الدوري ,,, و نزف المارد بالكأس للمصدار ,,,
أعتذر عن الإطالة ,,, بس تحمست حبتين و أنا بكتب ,,,