احنا شفنا المزحه والحرب
احنا شفنا البابور ندفى عليه والكانون الحطب
احنا شفنا تعريفه مصروف على المدرسه واذا عليت قرش
احنا شفنا نمشي على المدرسه بعز البرد اكثر من 2 كيلو يوميا
احنا شفنا البوط الصيني والبدله الفوتيك للمدرسه
احنا شفنا اللحمه مره بالشهر والطبيخ يوم الجمعه بس جاج وباقي الاسبوع بيض وسلطه
احنا شفنا نحمل فرش الخبز للمخبز ونصف على الدور علشان نخبز الخبز
احنا شفنا امهاتنا بغسلوا على ايديهم باللجن وتشطف الدار والحوش
طبعا انا حكيت الشغلات الخفيفه والبسيطه ما دخلت بالاشياء الصعبه كتير
فعلا انتوا شو شفتوا
صحيح عمي... لكن بدي احكي شغلة
على افتراض انه احنا جيل عايشين بنعمة كبيرة والحمدلله
اهل النرويج والدنمارك وهولندا هم أكثر شعوب العالم انتحارا لإنه كل شيء متوفر لديهم ولا هدف لحياتهم
بالنسبة للتعريفة مصروف للمدرسة.. والدي كان يوخد تعريفة بس كان يحكي انها كانت تجيب كيسين قضامة وبسكوت وما بعرف شو شغلات
بالنسبة للمدرسة مش جميعنا انحط بمدارس خاصة والباص أجاه لباب البيت.. درست 8 سنوات بمدارس الوكالة لإن المدارس الحكومية ما قبلتني فقط لإنه أصلي فلسطيني. وكنت امشي 5 كيلو يوميا 6 أيام بالأسبوع
يمكن شغلة المأكل معك حق فيها.. أجدادنا اللي همة آبائكم,, اضطروا يطلعوا من بلادهم وبلادنا وتركوا كل شيء وعاشوا في ظروف صعبة.. لكن الفلسطيني وين ما ينحط بطلع من الأرض وبعيش عيشة كريمة والحمدلله انتوا (آباءنا) ما قصرتوا معنا ونحمد الله دائما على النعمة
صحيح انه جدتي الله يرحمها كان عندها 13 ابن وابنة. وتغسل على ايدها وتزرع وتقلع بايدها وتخبز بايدها
مقارنة مع والدتي الله يخليلي ياها.. عندها 6 والغسالة فل أوبشن ومعظم الأشياء بتيجي جاهزة
لكن عندي أخت معها مرض توحد... بدها 3 خادمات يكونوا معها 24 ساعة ليقوموا فيها.. ووالدتي بتعمل الشغل كله
ما بعرف شو هي الشغلة المنطقية اللي ممكن تفسر هالشي.. لكن مثل جدتي... إمي من ال 7 الصبح لل 12 بالليل بتشتغل بالبيت
انا حطيت مثال على والدتي... وأكيد كل واحد وكل بيت عنده ظروف خاصة بتختلف