الصراحة ان محبط ومكتأب جدا من اللي صار اليوم ، يعني الفريق خذلنا وجابنا كتاف رسمي .
اليوم كان طويل ومن امبارح ما نمت وخربت السيارة واضطريت اني افل من الشغل واروح اصلحها قبل وقت المباراة ، وخلصنا شغل ورماح رماح ع الملعب ، ماسك اللفحة الخضرا بايدي وبالايد الثانية قزازة مي وساندوشة ودخلت الملعب ، فوجدت ما كنت اتوقعه منذ الصباح، جمهور يحتل مدرجات الملعب من الجلدة للجلدة ، جمهور هو الاجمل في العالم ، وكان اللون الاخضر يطغى على الملعب في منظر بقشعر البدن .
المهم بلش الجد و نزل الفريقين ع الملعب وبلشت المباراة ، فريق منظم والصراحة عارف شو بده مقابل فريق عبارة عن مزيج من ختيارية و اشياء اسمهم محترفين ولاعبين ما الهم دور بس لابسين كلر الاخضر ، اكلنا الاول من محترف ، اكلنا الثاني من محترف واكلنا الثالث وكان من محترف كمان ........ تخيلوا ثلاث اهداف وانا بستنى انه حد بالملعب يتحرك ويقول بس مشان هالجمهور المسخم نحاول ، وللاسف ما حد حاول او تحرك !
ركبت السيارة وروحت ع الدار معمي ظوي ، ولقيت ابني امجد بسستنى ، مسكين بدو يروح ع المباراة ، ولما شافني قال لي بابا لسه بدك توخدني ع المباراة ، قلت له لا يا بابا شكلوا فيها نومه ع البدري .