في مجتمعنا الأردني وكما في كل المجتمعات هناك الثقافات والطبقات المختلفه
لكل طبقه طريقتها في العيش ومفهومها عن الحياه الذي يختلف عن الطبقة الأخرى ...
ولا بد ان يكون هناك اتصال بين هذه الطبقات والثقافات المختلفه وهنا يحدث احيانا التصادم وتحدث المفارقات
لناخذ مثال وقصة كثيرا ما تتكرر من واقع مجتمعنا
عائلة ابو مدني وابو فلاح
عائلة ابو مدني من الطبقة البرجوازية انسباؤهم دار ابو فلاح من الطبقة الفلاحة الكادحة من اهل القرى والريف
بتصير مناسبه عند عائلة ابو مدني وكالعاده هذول مناسباتهم في فنادق فايف ستارز وبيعزمو نسايبهم الاعزاء ( مع تخوف من هذه العزيمه) دار ابو فلاح .
اول منظر بتشوفه على باب الفندق بعد ما يصف البكم ابو فلاح لابس هالدشداشه قاعد بشبر وبركظ ركاظ كانه ناس لاحقه وراه ابنه فلاح لابس بدلة عرسه (طبعا هو تجوز قبل 8 سنين) شاد حيله كمان بس مش ملحق ابوه هو واخوه مفلح ووراهم الثلاثه ام فلاح لابسه مدرقة سودا وخزنه مرة فلاح لابسه جلباب ومعاها 3 ولاد اثنين على حظنها وواحد بركظ وراها وخديجه اخت فلاح
ام فلاح : يا زلمه شوي شوي عليش انت طاير ول
ابو فلاح : استعجلي يا مره ... الله اكبر وبعدين معكي
ابومدني وام مدني اول ما يشوفو الجماعه فايتين بيقوموا يرحبو فيهم مع انه علامات عدم الرضا واضحه على محياهم
يا هلا بابو نسب ... اهلا اهلا موا موا
ام مدني بتمد ايدها من بعيد عشان تسلم بدون مباوسه ... بس وين .. هاي ام فلاح هاي .. بتسحبها سحبه زي (هالك هوجان) وبتبوس فيها يمين وشمال وبتفقع زغروته عالباب لولولولولولولولوييييييييييييييش ...
ام مدني بتتمنى الارض تنشق وتبلعها من الاحراج وبتحاول تبتسم بصعوبه
أجا دور أبو فلاح يسلم مدت ام مالك ايدها تسلم ... جفل ابو فلاح وفط هيك كانه حيه قرصته وفوت ايده من تحت الدشداش ومدها عليها ... ام مدني فكرت الشغله فيها مسدس فاجت بدها تهرب بس لما سمعته بحكي والله متوظي فهمت الموضوع وسلمت عليه بهالطريقه العجيبه
قعدوا الجماعه عالطاوله وبلش الحكي
ام فلاح : يا عيب العيب ... يا عيب الشوم .. شوف هالبنات ملطخات حالهمن ومصلخات شلون وقاعدات بتشخلعن وبتطعوجن قدام الرجال ما في حدى يضبهن
ابو فلاح: لا حول ولا قوة الا بالله الله يستر على ولايانا .. انا شو الي جابني هون ... أي انا حجي
ام فلاح: احكي ام مدني ... مش مستحيه ع شيبتها
ابو فلاح: خلص يا مره كلها ساعة زمن بنأدي هالواجب ومروحين
اجت اخت العريس بدها تسحب خديجه من ايدها : حبيبتي اومي ارئصي مع الصبايا
فلاح : ايش ... والله لارقص ع قبرها ... تسهلي يا خيه احنا مش لهالسواليف
بعد ما راحت ابو فلاح عرش هيك : والله زلمه يا فلاح ونشمي ...
المهم بيبلش الكيك شو والسلو دانس ...
فلاح : ول ول ول .... شوف وشلون ملزق فيها .. أي هذول قاعدين بتباوسو قدام الناس
ابو فلاح : والله ما ظل غير انه يـطب فيها .... استغفر الله العظيم
وبيقوموا الجماعه عالبوفيه
طبعا ابو فلاح مستحي وبيقول لمرته أي والله ما هو منظر 200 زلمه بين النسوان كل واحد قاظب صحن وصاف عالدور مثل ايام الجيش اول تا يحطوله رز وشقفه لحم ما بتشبع ابن فلاح ...
برد عليه فلاح ... شايف هالناس هظول كلهم يابا والله بغديهم بثلاثين منسف
ابو فلاح : أي والله انك صادق يا با ... يعني هاالعشا مكلفهم شوي وشويات ... انداري
وبعد ما يتعشوا الجماعه بيروح ابو فلاح مشان ينقط العريس .... يا حبيبي
بيسلم عليه قدام الناس وبمد ايده بجيبته وبيحط بايد العريس عشر ليرات
العريس بيحاول انه يفهمه انه هون ما فيه نقوط بس ابو فلاح الاستقبال عنده ضعيف شوي بهالمواقف هاي وطلق 3 مرات وحرم 7 مرات وحلف الايمان المغلظه واضطر العريس يحط العشر ليرات بجيبته
ودعوا الجماعه نسايبهم وركبو البكم التويوتا الازرق ويالله على البلد وسلامتكم