كما تريد اخي جمال ، انا لم اقصد ولم ألمح وسؤالي كان واضحا
عزيزي أبو المثنى، الشغلِه مِش كما أريد أو كما تريد
أنا سبق وحكيتلك إحنا هون في منتدانا اللي أنا بعتبره بيتنا اللي ما إلناش غيره بين كل البيوت الخَـراب وسط هذا الفضاء الإلكتروني، إحنا أهل، وبنتناقش فيه بمواضيع كثيرة تهمّ الجميع، لا يعني إنّي لما أفنِّـد جزئية معينة في كلامك، أو أنت تفنِّـد جزئية معينة في كلامي إنّي واقف لك أو أنت واقف لي عـ الدقرة.
يمكِن يكون خانك التعبير في كلماتك اللي تضمنها سؤالك، خاصة وأنك لما إجيت تفسِّر مقصدك من هذا السؤال، رحِت وقلبِت 180 درجة، فأنا من حقي إنّي أوضِّح المقصود من كلامي ومن كلامك وإنّي أفنِّـد هذا الكلام بالطريقة اللي ما تجيبِش إِلي ولا إلَك وجعة راس، والأهم ما تجيبِش وجعة الراس لمنتدانا هذا اللي إحنا بنعتبره بيتنا.
مِش أنا وأنت لحالنا اللي بنتابع وبنقرأ وبنحلِّل وبنفنِّد المواقف والأحداث والمواضيع اللي بتنطرح هون، لا يا عزيزي...
طَبْ أنت عارف أن (أحد المهتمين) اتصل بي هاتفيا وسألني السؤال التالي مستنكرا ومستهجنا بعد أن قرأ حوارنا أعلاه:
هسّة أبو بكر السيناوي صار خبير قانوني في عقود اللاعبين..؟!.
بمعنى، يعني هو اللي بيفهم بهيك أمور، واللي أجوا بعده طناجر..؟!.
ولك أن تتخيل ويتخيل الإخوة الأعضاء باقي مضمون الحوار في هذه المكالمة الهاتفية.
.
.
.
أخي أبو المثنى، للتوضيح وللتصريح:
أنا ما بكتُبِش مواضيع، وأعتقد أنك أنت شايف وعارف، ولو بدّي أكتب مواضيع فإن أغلبها سيكون موجها للحديث عن السياسات والقرارات المتخبطة، والتصرفات والسلوكيات غير السوية في معظم القضايا المصيرية في مسيرة النادي، لكن أنا بختار المواضيع والمداخلات التي يطرحها واحد زيّ أفضالك، وبعض الإخوة أصحاب المواضيع اللي في هذا السياق، ولما بتناقش مع أي أخ في منتدانا عضوا كان أو مشرفا، فأنا أحاول من خلال هذا النقاش الوصول إلى تصحيح بعض المفاهيم أو الوقوف على النقاط المهمة في الطروحات وتوضيحها أو تفسيرها، لأنني على يقين أن هذه الطروحات يتابعها الكثير من المهتمين، وبتوصل وبيقرؤوها، سواء أعضاء مجلس إدارتنا أو بيوصِّلها الكثيرون من أعضاء الهيئة العامة التابعين لهم أو المحسوبين عليهم، وأنا قدر الإمكان بحاول إنّي أوصِّل مضمون الطروحات لرغبات الجماهير من خلال منتدانا هذا (منتدى جماهير الوحدات) بطريقة مْشَفَيِه وواضحة، يعني مِش غرضي النقاش لأجل إنّي أكتب وبسّ، ولا لأجل المداقرة والمناكفة أو تصيّد الأخطاء، ولا -عدم المؤاخذة- عشان أنت يا عزيزي أو غيرك من الأعضاء الكرام تيجوا تحكيولي كما تريد..
مع كل الاحترام والتقدير يا غالي، لك ولكل الإخوة الأعضاء.