يوميات مراقب في الوحدات نت - يوميات مراقب في الوحدات نت - يوميات مراقب في الوحدات نت - يوميات مراقب في الوحدات نت - يوميات مراقب في الوحدات نت
المكان " غرفة المراقبين والمشرفين في الوحدات نت " على سطح النادي.
الزمان : ساعات الدوام الرسمي" نظام الشفتات" a b c
الشخوص والأسماء: متخيلة وليست حقيقية
الأحداث : من نسج الخيال.
........................................
" حمل حالو" وخرج من البيت. عالشفت b من 1 ظهرا حتى 7 مساءً.
الأم الحجة: " وين رايح يما " يا خلدون؟
المراقب: " عالمكشول " الوحدات نت ، وين رايح يعني على مجلس الشيوخ.
الأم: خليك ورا الشيوخ أشوف شو آخريتها" طبعا الأم فاهمة غلط.
يصل المراقب إلى غرفة المراقبين" على سطوح النادي" يسلم على الشباب.
مرحبا شباب، شو هالجو هون متى بدهم يبدلوا سطح الغرفة والله الزينكو هلكنا، الجو هون مخمر موز.
خلدون : طيب يا جماعة مروحة عالأقل " فطسنا من الشوب"
أحد الزملاء المراقبين: اقعد انطز هون، جاييك 10 رسائل عالخاص من عضو " سمج" ليكون ايييييييييي........... ويذكر اسم عضو لحوح، كل يوم بدو يكتب موضوعين ولازم ينزلوا على منتدى الجماهير.
خلدون: يا رجل والله عفت المنتدى من هاظ العضو، نفسي أخلص منو .
أحد المشرفين: لو كل واحد منا بدو يخلص من عضو زيو كان ما ظل اعضاء في المنتدى، وقلبناها بسطة خظرة " يلا يا بندوراااااااااااااااااه ، بطاطا بطاطا بطاطاااااااااااااااا" ويقلب الجميع على ظهورهم من الضحك.
مراقب المنتدى الأدبي: يا رجل عندي عضو في الأدبي، صاطلني بمواضيعو ، بيفكر حالو شاعر ، وكل " هسه " ببعتلي قصيدة.... مش قادر أقدر اخلص من شرو، اسمعوا شو بعث اليوم.
أنا احمد ابو حيه من جبل الاشرفيه
بحب الوحدات هو عينيه ورجليه
بحب عامر شفيع حب الزير للميه
من حبو يا جماعه صار راسي طبليه
خلصت القصيدة يا عينيه
يرتمي المراقبون على الأرض ضحكا على القصيدة.
أحد المراقبين : يا رجل والله مش عارفين نرضي مين ولا مين. كل عضو بدو مراقب ومشرف مشان يرضى حضرتو. وكل واحد بيتهمنا إنو متقصدينو خص نص ، وما ابننشر مواضيعو.
مشرف قرفان: ابتذكروا العظو" أبو خسة " لما هددنا يطبش المنتدى على روسنا لو ما نشرنالو موضوعو.
مراقب: طبعا ابنتذكر، هظاك يوم.... من الآخر.
مشرف من بعيد : بس حقو ، موضوعو حلو وبيجنن، بس إنتو بتخافو لأنو كتب ينتقد الإدارة.
مراقب " محسوب على الإدارة" كان لازم نقطع لسانو، لإنو بيتطاول على أسيادو.
مراقب معارض : بس لازم يكون في شفافية وموضوعية، ونسمح للرأي الآخر بالتعبير.
مشرف " موجهن - معاهم معاهم ، عليهم عليهم" يا إخوان الشغله بدها شوية مخ. يعني قصقص من الموضوع من هون، ولزق من هون، وهيك الشغله بدها شوية " لحلحه"
خلدون: والله هالشغله ما جايبة راس مالها. الله يرحم لما كنت مراقب في منتديات" النادي الملكي" ريال ماااااادريييييد" طبعا خلدون بلش يعك، ويعرط، والشباب عارفين قصصو.
مراقب صديق لخلدون جدا جدا:" بينكش مخاتو " بس أنت يا خلدون ما عليك لوم، ريال مدريد فرَّط بكفاءه زيك.
خلدون: يا سيدي ريال مدريد ولا الوحدات، كلها نوادي " بيكفي في الوحدات في زي افضالكم.
المراقبون معا بصوت واحد: بدهم يعملو جو لخلدون.
يا خلدون يا خلدون تعا لهون تعا لهون
يا خلدون يا خلدون - راسك قد التلفزيون
يضحك الجميع، ويستمر المنتدى في العمل على ما يرام.
ما أبدعك أخي ياسر .. طرح ساخر لكن غايته قيّمة ...
كل الشكر لإخوتنا المشرفين على جهودهم و تفانيهم في خدمة هذا الصرح ...
أن تحاول إرضاء شريحة كبيرة من الناس .. فذلك من أصعب المهام التي من الممكن أن تقوم بها ...