هذا السؤال كثير الواحد بيتعرضله
وخصوصا من بعض الناس اللي ما بتعرف شو هو الوحدات
بدأت القصة لما طلعت بالتكسي على استاد الملك عبد الله الثاني , كنت طالع على مباراتنا مع السويق العماني على ما أذكر
طبعا لابس أخضر ووجهي ملطس احمر
اتفرج فيا شوفير التكسي وٍسألني
شو اليوم في مباراة ؟
اه اليوم مبارتنا مهمة بكأس الاتحاد الاسيوي
اها وبين مين ومين المباراة ؟
الوحدات والسويق العماني
وجاي هون عشان تحضرها ؟ ليش ما تحضرها بالبيت ولا ما بتيجي على التلفزيون ؟
لا بتيجي بس يا عمي في بعد الملعب ؟؟!!
وقديش الدخولية ؟
3 ليرات الاولى , والثانية ليرتين
بس أنا بدخل على الاولى
اها... يعني 3 ليرات التذكرة وهي ليرة للتكسي وبالرجعة بدك تحط كمان ليرة
يعني مشوارك بيكلف 5 ليرات اقل شي
يا زلمة هو الفطبول و الوحدات بيطعموك خبز ؟؟
والله يا عمي الحياة مش عبارة عن خبز
وانا ما بروح على الملعب وبشجع عشان احضر فطبول
بروح عشان الوحدات
ان شاء الله بيلعب جلول
لو بدي احب الوحدات عشان الفطبول
كان حبيت برشلونة ولا الريال اكثر
وهون اتذكرت مباراتنا في ذهاب الدوري مع كفرسوم
كنت طالع مع الجرينز وانلطعنا بالشمس وتبهدلنا واكلنا هوا
وكان الملعب بيخزي , ولما صفر الحكم واحد من اللي كان معنا زعل وحكى بصوت عالي إحنا جينا من عمان !! وبتتعادلو
فرد عليه واحد وقاله واللعيبة من وين إجو ؟؟
والله لو الوحدات يخسر من الطرة 12 صفر لأضل أحبه , وصار يصفقله بحرارة
وصلت , ونزلت من التكسي كان نفسي أقوله اني ما بحب الوحدات لانه نادي كرة قدم أو سلة او نادي طائرة
بحبك يا وحدات لانك أكبر من نادي , بحبك يا وحدات لأنك حياة و رمز للعشق وانتماء