إنهاء عقد دانيال - إنهاء عقد دانيال - إنهاء عقد دانيال - إنهاء عقد دانيال - إنهاء عقد دانيال
مسا الخير
الموضوع ليس المقصود منه التجريح بأي شخص
كل الشغلة مداعبات فقط وفشة خلق.. وكل اسم مذكور في الموضوع على راسي وله كل الاحترام والتقدير.. ودانيال بعرواهم كمان.
........................................ ...........
مسرحية تراجيدي عنوانها : إنهاء عقد دانيال – الحلقة الأولى- مباشر
تفتح الستارة على مشهد طارق خوري وزياد شلباية وأعضاء الإدارة والمدرب أبو زمع في جلسة لمناقشة موضوع إنهاء عقد دانيال.
خوري: يا خوان ترى إنهاء عقد هاظ اللاعب صار مطب جماهيري – قصدي مطلب- ولازم ننهي هالموظوع هسا هسا في هالاجتماع.
زياد: صحيح يا طارق صحيح وإحنا مش قد غضب الجماهير.. يا خوفي بكره يعتصمو قدام النادي وهات حيِّكها بعدين بيصيروا يقولوا مخيم الوحدات معتصم ضد الحكومة.. ها شو رأي إخواني الأعضاء. شو نساوي ؟
أحد اعضاء الإدارة- بحب دانيال وبموت بشلاطيفو موت- بس يا إخوان لازم ما نستعجل وضروري نعرف رأي المدرب،،، مهو بردو مدرب مش شرابة خرج ولا طرطور عند حضراتنا. لازم نسمع رأيو؟؟ ها سولف عمي أبو شعرات ناعمات.
أبو زمع: يا أخوان أنتو على راسي والجماهير على شواربي، بس المسألة مش سهلة زي ما انتوا مفكرين.
طارق والأعضاء بصوت واحد: وليش مش سهله يا عبد الله ،قول.
أبو زمع: بصراحة انتو ما ابتعرفوا مزاج دانيال،،، دانيال عصبي وإيدو والكف.. وانتوا شايفين ايدو زي المرزبة،، وشرفي لو صفق واحد فيكو كف بعورو عور.
زياد: شو بتقول،، طيب ما دام عارفو هيك ليش ما حكيت من أول. ليش ظابو بالفريق؟
فجأة يدخل عامر ورأفت والحسون على الاجتماع.
أبو زمع: حلو هاي أجو الشباب.
عامر: خير شو في؟
حسن: مالكو الواحد فيكم زي يلي ماكل ستين كف عخد واحد؟
رأفت : هههههههه. وحياة خالتي ميسون حاسس كأنو الواحد فيكو عاملها عحالو... شكلكو زي يلي سامع خبر وفاته قبل شوي هههههه.
طارق: بصراحة بدنا ننهي عقد دانيال.
الشباب مع بعض بصوت عالي وفيه رجه في الزور وارتعاش في البلعوم وتكتكة في الكندرة – قصدي الحنجرة -: شووووووووو ننهي وما ننهي وعقد ما عقد. ومين هاظ يلي بقدر يقول لدانيال هالحكي...؟؟
حسن: يا حبيبي والله غير يقطعكوا حتت حتت. هههاي ...
طارق بدو ينكش مخاتو على زياد.. ويحرجو بين العويده.
أكيد زياد شلباية قدها وراح يحكيلوا هالحكي.
زياد: طبعا قدها وقدود كمان .. انا زياد.. وحياة خالتي لانهي حياتو مش عقدو كمان.
ساعة الصفر في حياة زياد ... رحمة الله عليك أبو الزوز .. رحت بالرجلين.
يخرج زياد - الأسد- باتجاه الغرفة المجاورة للقاء دانيال.
بيطلع وبيلاقيش حد يلحقوا من الشباب بركي بيرجعوه !!!... بيلف ظهرو وببلع ريقو وبكمل الطريق وعرقو معبي أواعيه
يدخل وبيشوف دانيال عن بوكل علبة مرتديلا يونيوم لاففها بعشرين رغيف شراك.
دانيال : ينظر بعيونه المجمره على زياد. وبصوت خشن وبرعد رعد : شو في أبو الزوز ؟ مالك زي يلي بالع موس كباس؟ في بثمك حكي. احكي
زياد والعرق بيشر شر من ذقنو.. ورجليه مش حاملاتو: لا لا ما في شي، بس حبيت احكيلك مسا الخيرات.
دانيال : بيقرب من زياد وبيحط جبهتو على جبهة زياد. ومنخارو على منخارو وبيقول: احكي زياد احكي ،، ؟؟
زياد ورجليه بطلت حاملاتو من الخوف.. بيشد على حالو.. وسنانو عم تصك ببعض وبيقول:
بدنا ننهي عقدك يا كابتن؟؟ وبوقع تحت رجلين دانيال .. وبيصير يعيط
دانيال: والغضب سواه بركان وانفجر وصاح . يااااااااااااااااااااااااااااااااااااااا ااااااااااااااااااع وبظرب الطاولة برجلو بيجيبها شقف
زياد وهو يلتقط الأنفاس الاخيره بيحكي في عقلو : كان اتشاطرت وسجلت قول في مرمى الشباب بهالرجل الطرمة هاي الله يكسرها.
رد صاح دانيال مرة ثانيه : يااااااااااااااااااااااااااااااااااااااا ااااع
زياد طبعا من الصوت قام وقف على نص رجل. ووقع على الأرض وبلع لسانو وحواجبو.
دخلو الشباب من برا... وشافو هالشوفه
دانيال : هجم عليهم بالكراسي ... وسُمعت أصوات سيارات الإسعاف على باب النادي بتلم الجرحى والمصابين .
كتبت الجرائد في اليوم التالي: زلزال يضرب مخيم الوحدات ويخلف قتلى وجرحى ومفقودين.
كتبت جريدة أجنبية – لها اجندة داخلية- عودة كنج كنج الى الحياه من جديد في Jordan بالإنجليزي طبعا..