السلام عليكم
بالفترة اللي فاتت بلشت بمشروع ترخيص السيارة،، عن جد السنة هاي كان الترخيص مشروع،،
اول زيارة رجعوني على الدهان والدخان،، دهان مش معترض،، السيارة فعلا كان بدها دهان،، بس دخان!!!
انا بعرف سيارتي ما شاء الله عليها ما بتدخن ولا بتأرجل،، أصلا انا مفهمها انو حرام مش مكروه،،
المهم اتداينت خمسمية نيرة قلت بدهن وبرخص،، رحت على صاحبنا الدهين،، وأعطاني على طواحيني،، مع اني مركب طقم وما عندي طواحين،، حكالي انا باخذ من الناس خمسمية دينار،، بس انتو زبايني وبيكفي أربعمية،،
حكيتلو ، حواليك شوية كاز عشان احرقها قدامك،، المهم بين أخذ ورد وواسطات ع التلفون اخذ ثلثمية ، مع الطمبون والذي منو كلفت حوالي خمسمية،، استنيت لما اجا الراتب،، ورجعت ع الترخيص كمان مرة بعد ما اكثر من واحد حلفولي انو ما في دخان،، بس لمين تحكي،، ما اقتنع الصقر اللي بيشوف الإبرة عن بعد كغم انو ما في دخان،، شفنا واسطة،، وما زبطت،، رجعت ع الميكانيكي،، اعطاني حل جهبذ،، لعب بعيار الماتور،، بحيث انو السيارة ما تطلع دخان بس على حساب السحب،، يعني اكثر من ثاني لا تحلم تمشي، ورجعت ع الترخيص،، هالمرة اجا حظي مع المحقق كونان،، إدعس،،، إدعس،،،دخان ما في ،، بس انت لاعب بعيار الماتور،، يا حبيبي ماشي بس المهم ما في دخان،، حكالي لأ زبط وارجع،،
صفيت ع جنب و حكيت مع واحد من طرف واحد عن طريق واحد،، ورجعت عند نفس المحقق،قصدي الفاحص،، بس لأنو هالمرة في واسطة،، سبحانو في مكانو،، اختفى الدخان وراح صوت الأكزوزت،، والسيارة صارت مية مية يا عم،،،
هذه قصتي مع الترخيص هذا العام،، وبدون اختصار،، ومش آسف ع الإطالة،، لأني بدي انسطح،،
عشان تعرف يا اللي في بالي،، سلام
عسيرة الترخيص ..بس اسمع بهالكلمة بنتفض بدني ما بعرف ليش ..
يا حبيبي والا لما يحكيلي الزلمة اللي ببكى كاعد بجني ارجع لفرس ..بصير عركي مركي ..
عشان هيك اخر مرة فحصت نظر كصدي سواكة بثلاث تموز يعني كبل شهرييييييين ونيف ..