أول درس في العنف لما كنا صغار هو غرفة الفيران...وكانت أول درس في ثقافة العنف المكتسبة في الروضة.. الغرفة الوهمية إللي كانوا يهددونا فيها بالروضة وبعدين في المدرسة وكلام المعلمة تقول: إللي بأسمعو عم يحكي بحطو بغرفة الفيران
كمان العنف النفسي اللي كان يمارس من قبل الأهل
يعني الكلمات اللتي كنا نسمعها دائماً
مثلاً: والله لأفرمك - والله لكسرك - بدي أكسر إيديك - بدي أقبرك - بدي أهري وبرك - بدي أسلخ جلدك عن عضمك - بدي أكسر عضامك ..................الخ
في مصطلحات عنف كانت تعتمد على الطب
والله لأقلع لك عيونك - والله لأطير راسك عن بدنك - والله لأقطع رقبتك وأحملك إياها - والله لأقص لسانك أو إيدك
في عنف مشتق من الحيوانات
والله لاخليك تقاقي ما تلاقي - والله لاخليك تعوّي متل الكلاب
وفي عنف رومانسي
والله لافرجيك نجوم الضهر
(وصارت نجوم الظهر معروفة عندنا أكتر من نجوم الليل)
في عنف دبلوماسي أكيد عرفتوه
وهي اللحظة اللي بيجي فيها الوالد الكريم
وبيقولنا: تعال يا بابا نتناقش بهدوء اعتبرني رفيقك
وبغباء الأبن المعهود منصدق وعند أول اختلاف في وجهات النظر بيناتنا ينهي الوالد النقاش قائلاً: ولاك "...."صار عندك وجهة نظر يا نص مصيص!! إسمع ولا حيوان كبرت أو صغرت .. طلعت أو إنزلت .. بضلك تحت هالصرمايه العتيئه ولازم تعرف أنو ما بيمشي غير اللي أنا بقولو أوم ولا من وجهي وروح إنطز!! والله جيل أخر زمن .. والله عال هاي اللي كان ناقص علينا
حتى في غنائنا لأطفالنا عنف
لما بدنا نيم الطفل منغني له الأغنية اللي بتقول: يلا تنام ويلا تنام لدبحلك طير الحمام
تخيل انك عم تنيم طفل صغير عالأغنية اللي فيها دبح حمام وبعدين ما منكتفي بأنو نقلو أدبحلك طير الحمام منيجي منقلو: روح يا حمام لا تخافي انا عم اضحك على (****) يعني منبلش بالدبح ومننتهي بالكذب و المراوغة
و لسه بيسألوك كيف عشت طفولتك؟؟؟؟؟
أهلاً طفولة
الاطفال وقت تربيتهم السليمة اول 5 سنين من عمره
احنا بنضعف شخصيته اذا ما بنعدمهآ بالاساليب اللي حكيتهآ
وبالاخر بيجي الأب والأم ليش الولد غبي او عدواني
مع العلم الطفل ما بينسى ....لو شو ما كبر