عدنا بعد انقطاع طويل بطلّ عليكم من جديد وبحكيلكوا السلام عليكم
هذا الموضوع مش بس عن الاردن .. .. يمكن ان يطبق في كل الدول ... وانا ما اخترعت شغلة جديدة
لا والله لو اخترعت اشي جديد كان لسه ما بكتب هون على قولة البعض
الوضع يا اخوان مش زي اول .. وضع البلد والعبدلي ...لا عنجد يا اخوان .. انا عارف انه 99% من البشر خاصة في الاردن وضعهم الاقتصادي متدهور
"خاصة مع ارتفاع سعر اخونا " اوكتان 95
بعدها زعل اخونا " اوكتان 90 " وكمان راح رفع من سعر حاله لا تفكروه رخيص لهالدرجة
المهم عداك عن الكهرباء ونقص المياه اللي ومنذ خلق الكون تعاني منها الاردن
وعارف منيح انه في فساد وافساد في الاردن .. وصار الفساد تقريبا عيني عينك
والله عارف وفاهم وبعاني مثلي مثل أي كائن بشري بعيش في الاردن
ولكن يا اخوان في حل بسيط بايدنا والله بسيط
يعني احد صحابنا بشتكي من " الطفر " حقه اخونا
بس انه كل يوم والثاني تروح على الكافيه توخد نفس ارجيلة
لا هون لازم نوقف
لانه هذه صارت ظاهرة اجتماعية مؤسفة
يعني يكاد لا يخلو بيت من الارجيلة والدخان
طب حسابيا لو وفرنا حق راس الارجيلة او " راس السرطان " والله بطلع في توفير آخر الشهر
بكفي يطعمي عيلة كاملة
وبنط واحد بحكيلك طب هي وقفت على هاي .. خليها على الله
يا زلمة تبا لك على قولة رجائي قواس
طب ما هو بالحياة في عدة خيارات
ليش تختار الأسوأ
ودايما بتحط الحق على الحكومة وعلى غيرك
لما تسمع انه الاردن تصرف على التدخين بما يقارب مليار دولار سنويا
يعني بالله عليكو منطق
لو كان تنفق مليار على الاكل
بقولك الموضوع فيه وجهة نظر
بس على التدخين .. يعني على الموت .. مليار والله حرام
وعشان البعض ما يزعل حتى لو دينار حرام
!!اذا مش حرام في الاسلام .. حرام اقتصادا وفكرا ومعيشة ومنطقا
فالله يسعدكوا خلينا صحاب وحاولو تخففوا الدخان والارجيلة شوي
وبعدين بتذكر
كل ما اطلع من الامتحان ايام الجامعة
بتقلب الجامعة ضباب
لانه الطلاب بسحبوا باكيت الدخان ويطلقوا حملة تطعيم على الجامعة وعلى الدكاترة وترافق هذه الحملة سحبة سيجارة
وبعدين يعني اللي بدخن .. يا اخي موت لحالك ما في داعي تموتني معك
وهدية مني الك هذه الصورة
"وكمان هذه الصورة عارف انه نصكو راح يحكي "فوتوشوب
طبعا كلمة فوتوشوب صارت متل مرحبا
بس على الاقل خلينا نفهم شو بتحكي العبارة
تحكي يا سيدي العزيز
احنا عارفين انه حياتك ما الها قيمة
بس البترول مكلف للغاية
واللي فهم فهم واللي مش فاهم راحت عليك
مش قصدي اني اهين اي مدخن
بس انا بهين المدخن اللي بدايق اللي حواليه لما يدخن
وقصدي على المدخن اللي طول نهاره بشكي من الفساد والافساد في الارض وفعليا انه في حق كبير كتير عليه ولاعب اساسي في مباراة الفساد وعنده نوع من التناقض
بطلع واحد راح يحكي يا نضال خف علينا شوي حسستني انك ملاك
لا والله مش ملاك انا كائن بشري مثل ما مكتوب في العنوان فوق بس على الاقل بحاول ما احط الحق دايما على غيري