السلام عليكم
القصة بدت انو ابني عمره 7 سنين كنت واعده بمشوار سداد دين لانو اخوه ابو 11 سنة طلع مشوار مع صحابه والزغير ما راح ،المهم الولد تذكر قبل المبارة بساعة انو في مشوار برقبتي وانا مجهز حالي احضر المباراة بالبيت
فجأة خطرت لي فكرة عبقرية واكتشفت انها غبية فيما بعد ، قلتله شو رايك نروح نحضر المباراة في الملعب ؟
انبسط ومنت عليه ناخد اخوه معنا وانطلقنا الى الملعب .
لحسن الحظ وصلنا على بداية المباراة يعني فيش ازمة ، قلت يا ولد المبارة مش راح تكون مشحونة زي مباريات الهذولاك خذ تذاكر خاصة وفوت والامان بوجه الكريم .
بالفعل دخلت وتفتشنا وما شالله صار الفار يلعب بعبي انو شو الي بينحكى عن عدم احترام الدرك للجماهير بس اكتشفت بعدين شو السبب
تفتشنا وتفضل فوت وشوية بدهم يعزموني على فنجان قهوة ، دخلنا الدرجة الخاصة لاقيت بتطلع حولي ادور مكان وبس الوجوه كلها حولي مكتوب عليها عبس وتولى !!!!!
تطمنت انو في حريم في الدرجة الخاصة قلت اماااااان ز وصرت ادور مكان نقعد فيه
ما في دقيقتين والا بسمع واحد بسب مسبة حاولت اسكر ذنين الولد ليسمعها بتطلع عليه والا جنبه حرمة قاعدة رفعت ايدي عن ذنين الولد وقلت اذا المرة بستمع وما تأثرت خلي الولد يستمتع بهيك موشحات كنت افكرها منسية واكتشفت انها منشية . شوية والا الجمهور من الدرجة الثالثة بنادي رافت علي ، والي حولي بردوا بصوت واحد بنفس الموشح الحلو الي لابقلهم بس الشهادة لله ما سمعت صوت انثوي فيه .
المهم هون وقلت خلص سحبت الاولاد وطلعت ، والا الدركي الي كان بدو يضيفني وانا داخل بسالني ليش طلعت ما بتقدر تفوت مرة تانية ، شرجتله الوضع قلي الله يسامحك شو جابك هون كنت رحت على الجهة على يمين المنصة .رسمت العبط وقلتله ليش ؟ قللي ما بتسمع هالمسبات هناك !!!!
قلت وشهد شاهد من اهلهااااا قلتله لا هون ولا هون انا مروح وسحب الاولاد وروحنا امهم بتسالهم ليش رجعتوا الزغير بقللها لانهم قلال ادب !!!!!!
بتصدقوا كل هاد صار والجول الاول لسه ما اجا سمعت الجمهور وانا مروح وعرفت انو اجا جول !!!!
يعني حضرت 3 دقايق من المباراة وروحت .
سؤالي بينفع هالدركي المحترم يكون شاهد عياااااان ؟؟؟؟؟
شكرا للتفاعل
مني وعلي بعتبر الي صار درس للاولاد لو ظليت اشرحلهم اياه سنة بالكلام ما راح يفهموه واهم درس لو اجتمعت مع هيك بشر لا تجاريهم وانسحب اشرف الك .