أسمحولي لي أعضاء المنتدى الكرام ان اكتب هذه المرة بلهجتنا العامية...عشان اعرف افش غُلي منيح 😥😥
مش عارف شو خلانا ندخل هيك بطولة من الاساس والله لو محل الجهاز الفني ما بحط حالي بهيك موقف ولا بحرج حالي مع جمهور الاخضر، يعني الاتحاد سحب منك معظم اللعيبة ودعم مادي ومعنوي ما في وحتى اتحادك ما كلف خاطره ولو بكلمة او منشور على مواقع التواصل او حتى على ابواب الجوامع ما يدعمك ، قدر الله وما شاء فعل ودخلنا البطولة وبلشت المنافسة وهون ما في يما ارحميني واول مواجهه كانت مع العالمي النصر السعوي الي كان ضايع وتايه بالمباراة ومش عارف شو بعمل وفوق كل هاد ابو زمع افندي ما تجرأ وغامر حتى لو ( بشلن ) والله لو شد حيله شوي صغيره كان عالاقل طلعنا بهدفين، وانتهت تعادل وعينك ما تشوف الا الطبل والزمر اشتغل عند الجمهور الغلبان المسكين وحقهم يفرحوا لانه لو كان النصر مصحصح لشفنا سيارات الاسعاف بتلعلع بشوارع المخيم ومش عارفين الصح انه التعادل اجا مع الفريق ببلاش يعني زي ما قالوها ( مع الهبل دُبل ) ونيجي على مباراة فولاذ الي فعلا هو المنيوم او بالأحرى تنك، بس هبل الجهاز الفني عمل منه غير هيك، واول الخبصات التشكيلة لحد الان مش فاهم ابو زمع ليش بلش المباراة بديارا ولد ارعن واهوج وما عنده حسن تصرف نهائيا وعندك عالاحتياط احسن منه ولشو جبت احمد هشام ولحد الان ما شفنا خلقته ومش بس هيك وحضرتك 75 دقيقة وانت حاشر الفريق حولين الجزاء وحتى اول ركنية للوحدات تقريب الدقيقة 80 والله لو انها تقيسمة بغمدان ما صار فينا الي صار وضاعت للمباراة بايدينا ويا حسرة علينا لا كسبنا المباراة وكسبنا صيام هظاك اليوم من ورا تخبيصك ومن القهر نمنا بدون سحور، ونيجي على مباراة السد المفروض يا بروفيسور ابو زمع فريق زي السد مرشح اول للبطولة قبل ما تحضر خططك الفاشلة تبلش تحضير نفسي وذهني للفريق وحتى لو بدون خطة او تكتيك كان طلع معك احسن من هيك بداية وكان واضح الفريق نزل مغلوب وخايف ومنتعن فاطسه ومنيح الي مرت على هيك
بس السؤال القوي طوال المباريات الثلاثة الاشواط الاولى ليش هيك وضعنا بكون اقسم بالله اشي مش معقول يعني عالاغلب من 60 ـ 75 دقيقة تخبيص ونوم وبالاخر بنصحى اسود والله لو شدينا وكنا مصحصحين من الاول لكان عالاقل في جيبتنا 6 نقاط ولو حضرتك بتفهم وبتتعلم من اغلاطك كان مباراة السد وبدون مبالغه انتهت وحداتية 3-1 وكل الجمهور متأكدين من هالحكي
اخر شغلة بحب احكيها للادارة المؤقتة وبالاخص عبدالفتاح الكوز نصيحتي الك افسخ عقد الجهاز الفني وعيين( حسن جراد) سائق النادي مدير فني وكل الجمهور براهنك على الدوري والكاس وتحطيم كل الارقام القياسية للموسم السابق ، الله يكون بعون جمهور الوحدات المسخمط وحسبي الله على من اوصل النادي لهيك حال
الوحدات والمشاركة الاسيوية
